Vistheimili að Hamarskoti
Þann 1. janúar 2010 gerði Barnaverndarstofa samning til reynslu í 12 mánuði við hjónin Sigurð Inga Sigurðsson og Gerði Hreiðarsdóttur um rekstur vistheimilis að Hamarskoti í Flóahreppi. Vistheimilið Hamarskot er ætlað unglingum frá 16 ára aldri sem hafa lokið grunnskóla, hafa lokið meðferð á vegum Barnaverndarstofu og eiga ekki afturkvæmt á heimili sitt og barnaverndarnefnd þarf að ráðstafa skv. 25. gr. barnaverndarlaga. Hamarskot getur einnig tekið á móti þunguðum konum sem barnaverndarnefndir telja nauðsynlegt að fái aðhlynningu og meðferð á viðeigandi stofnun, sbr. 30. gr. barnaverndarlaga. Barnaverndarstofu og viðkomandi barnaverndarnefnd ber að meta þarfir viðkomandi konu í samráði við rekstraraðila áður en til vistunar hennar kemur.Á heimilinu mega dvelja allt að fjórir unglingar undir 18 ára aldri. Að auki er heimilt að einstaklingar á aldrinum 18-20 ára búi í sjálfstæðri búsetu í smáhýsum við heimilið sjálft. Heildarfjöldi má aldrei fara yfir sex og að hámarki mega fimm einstaklingar dvelja samtímis inni á heimilinu sjálfu (ekki í sjálfstæðri búsetu).
Barnaverndarnefndir sækja um vistun beint til rekstraraðila í Hamarskoti. Ef umsóknir eru ekki í samræmi við viðmið markhópsins þarf barnaverndarnefnd að sækja um vistun til Barnaverndarstofu áður en til vistunar kemur. Óski nefndir eftir að nýta heimilið sem úrræði fyrir þungaða konu skv. 30. gr. barnaverndarlaga ber að sækja um slíkt til Barnaverndarstofu.
Nánari upplýsingar um samninginn og framkvæmd vistunar má nálgast hér.
